"मौसम" (गज़ल)
**************************************************
यो रुज्यूं-रुज्यूं सि भिज्यूं मौसम ।
यो भिज्यू-भिज्यूं सि रुज्यूं मौसम ॥
बेरी-बेरी फेरि कुएड़ि लौंकै जांद,यो मनस्वाग बाग सि गिज्यूं मौसम ॥
बेरी-बेरी फेरि सुपिन्यां खोलि जांद,यो सर्या रातिकु सि बिज्यूं मौसम ॥
बेरी-बेरी फेरि खुद लगै जांद,यो जण्यूं-पछ्यण्यूं सि दिख्यूं मौसम ॥
बेरी-बेरी फेरि माया पैड़ जांद,यो लिख्यूं-पड़्यूं सि सिख्यूं मौसम ॥
बेरी-बेरी फेरि झैळ लगै जांद,यो काचु अमलटु सि मुज्यूं मौसम ॥
बेरी-बेरी फेरि दपगा मारि जांद,यो नांगा हथ-खुटौं सि छिज्यूं मौसम ॥
बेरी-बेरी फेरि कनै भाजि जांद,यो टिमरु कु ट्यक्वा सि टिक्यूं मौसम ॥
बेरी-बेरी फेरि मोल-भौ कै जांद,यो हत-हथ्यूं मा सि बिक्यूं मौसम ॥
बेरी-बेरी फेरि दौंळि बांधि जांद,यो लैन्दी गौड़ि सि पिज्यूं मौसम ॥
बेरी-बेरी फेरि याद दिलै जांद,यो आंख्यूं मा आंसु सि रुक्यूं मौसम ॥
बेरी-बेरी फेरि जिकुड़ि भैर आंद,यो गाळ मा क्यूंकळि सि लुक्यूं मौसम ॥
बेरी-बेरी फेरि आंखि भीजि जांद,यो छारु-माटु-गारु सि सुख्यूं मौसम ॥
बेरी-बेरी फेरि कीच-कीच कै जांद,यो "पयाश"देखिकि खिज्यूं मौसम ॥

पयाश पोखड़ा

+91 92132 27970

PUBLICIZED BY उत्तराखंड की लगूली