" खाली,खल्टा,खल्लम-खल्ला" (गज़ल)
*******************************************
खाली,खल्टा,खल्लम-खल्ला ! 
एक दां अपड़ा गांव त चल्ला !! 
काका न ब्वाडा, भैजि न भुल्ला रे,
मेरि डंड्यळि, तेरि तिबरि,

खल्लम-खल्ला रे, खल्लम-खल्ला रे....
गगरि न कस्यरि, लारा न झुल्ला रे,
मेरि नवळि, तेरि पंद्यरि,

खल्लम-खल्ला रे, खल्लम-खल्ला रे....
गोळण न सांगळ, बन्द न खुल्ला रे,
मेरि मंज्युळि, तेरि उबरि,

खल्लम-खल्ला रे, खल्लम-खल्ला रे....
खुम्का न वीरा, घ्याळ न हल्ला रे,
मेरि उर्ख्यळि, तेरि जंदरि, 

खल्लम-खल्ला रे, खल्लम-खल्ला रे....
ज्युड़ि न दौळिं, गोठ न पल्ला रे,
मेरि थ्वरिड़ि, तेरि कळ्वड़ि,

खल्लम-खल्ला रे, खल्लम-खल्ला रे....
दै न दग्ड़्या, पैसा न पल्ला रे,
मेरि सुप्पी, तेरि ठ्वपरि,

खल्लम-खल्ला रे, खल्लम-खल्ला रे....
बूण न घार, हिटा न चल्ला रे,
मेरि जांठि, तेरि छतरि,

खल्लम-खल्ला रे, खल्लम-खल्ला रे....
त्यूंखी न गत्यूड़ि, थ्यग्ळा न टल्ला रे,
मेरि धोति, तेरि चद्दरि,

खल्लम-खल्ला रे, खल्लम-खल्ला रे....
ख्वींडा न अबिंडा, बुरा न भल्ला रे,
मेरि मुण्डळि, तेरि ख्वपरि,

खल्लम-खल्ला रे, खल्लम-खल्ला रे....
"पयाश" य यकुलांस, फेरि भेंट कल्ला रे,
जिकुड़ि कि पीड़ा, पोखड़ा का स्वीणा,

खल्लम-खल्ला रे, खल्लम-खल्ला रे....
खल्लम-खल्ला रे, खल्लम-खल्ला रे....

पयाश पोखड़ा

+91 92132 27970

PUBLICIZED BY उत्तराखंड की लगूली