"वो इसकोला का दिन" (गज़ल)
*******************************************
आज बि कना छन जग्वाळ,वो इसकोला का दिन ।
निछैंदि मा बि इगास-बग्वाळ,
वो इसकोला का दिन ॥
चिरीइं कितबि उधड़्यूं बसता,वा कैपिटल कौपि कख जि ध्वाळ ।
आज बि कना छन जग्वाळ,वो इसकोला का दिन ॥
कख हर्चा वा स्या की टिक्कि,वेलडन की दवति मा ज्वा छ्वाळ ।
आज बि कना छन जग्वाळ,वो इसकोला का दिन ॥
गुर्रौ कु कांचळ, मोर फंखुड़ू,दिख्याई, जनि किताब ख्वाळ ।
आज बि कना छन जग्वाळ,वो इसकोला का दिन ॥
मि चोर निछौं, बत्ती कसम,दगड़्या का अग्वड़ि बसता फ्वाळ ।
आज बि कना छन जग्वाळ,वो इसकोला का दिन ॥
अरे ! पैसौं का सार नि लग,दे द्यूलु रे तेरि पंजी-दसी भ्वाळ ।
आज बि कना छन जग्वाळ,वो इसकोला का दिन ॥
भ्वाळ बटैकि टक्क लगै पढलु,सर्या साल इन बोलिक धंग्वाळ ।
आज बि कना छन जग्वाळ,वो इसकोला का दिन ॥
दगड़्या नमान पढ़णा रैनि,घमतप्पा रौं मि फील्डा तिर्वाळ ।
आज बि कना छन जग्वाळ,वो इसकोला का दिन ॥
सुबेरलेकि इसकोल जाण,ब्वै ल मिथैं सिनक्वळि सिवाळ ।
आज बि कना छन जग्वाळ,वो इसकोला का दिन ॥
अ ब स एक समकोण तिरबुज चा,कंदुड़ु मा बयांदा यो सवाल ।
आज बि कना छन जग्वाळ,वो इसकोला का दिन ॥
झणि कख ह्वैलि वो दगड़्या ?जैल द्या छाई वो रेसमि रूमाल ।
आज बि कना छन जग्वाळ,आज बि कना छन जग्वाळ,जग्वाळ, जग्वाळ, जग्वाळ,वो..............
इसकोला...का.............

पयाश पोखड़ा

+91 92132 27970

PUBLICIZED BY उत्तराखंड की लगूली