"द त्यारा भांवल त"(छोड़ तेरी बला से) (गज़ल)
*******************************************
मि कब साठ साल कु ह्वै ग्यौं--द त्यारा भांवल त ।
मि कब माट ताळ कु ह्वै ग्यौं--द त्यारा भांवल त ॥

त्यारा गांवा का बाटों थैं, कुरचदा- कुरचदा ।
मि कब गौं गाळ कु ह्वै ग्यौं--द त्यारा भांवल त ॥

तू सदनि मेरि मयळ्दु माया,म्वळ्याणि रैई ।
मि कब उधार पगाळ कु ह्वै ग्यौं--द त्यारा भांवल त ॥

सुपिन्यौं का पल्या छाल,तु भि बैठीं रैंदि ।
मि कब वल्या छाल कु ह्वै ग्यौं--द त्यारा भांवल त ॥

माया मम्ता पियार पिरेम,सबि कुछ त त्वैमा ।
मि कब जैर दूधिबाळ कु ह्वै ग्यौं--द त्यारा भांवल त ॥

तुम बसगळ्या बणदर्यूं मा,चखुला सि छपत्वळ्यौ ।
मि कब ढाळ पंदाळ कु ह्वै ग्यौं--द त्यारा भांवल त ॥

'पयाश' गाणि करदा रै ग्याइ,द्यखणा की ।
मि कब वै तूनाखाल कु ह्वै ग्यौं--द त्यारा भांवल त ॥
द त्यारा भांवल त ॥

पयाश पोखड़ा

+91 92132 27970

PUBLICIZED BY उत्तराखंड की लगूली